விதவிதமான முட்டை சைட் டிஷ்கள்@ !

விதவிதமான முட்டை சைட் டிஷ்கள்

ஒரு கோழி போடுற முட்டை அதில என்னென்ன விதவிதமா சமையல் செய்யலாம் என பாருங்கள் நண்பர்களே !.


அவித்த முட்டை (Boiled Egg)
முட்டையைத் தண்ணீர் உள்ள பாத்திரத்தில் போட்டு 10 நிமிடம் அவித்து எடுக்கவும். தண்ணீரில் உப்பு சேர்த்தால் ஓடு உடையாது.


ஆஃப்பாயில்(ட்) (Half Boiled egg) 
முட்டையை தோசைக்கல்லில் மஞ்சள் கரு உடையாமல் ஊற்றி உப்பும், மிளகுத்தூளும் சேர்த்தபின் அடிப்பாகம் வெந்தபின் திருப்பிப் போடாமல் மஞ்சள் கரு உடையாமல் அப்படியே அரைவேக்காட்டில் சாப்பிடவேண்டும். அதை மஞ்சள் கரு உடையாமல் சாப்பிடுவதுதான் திறமையே !

ஃபுல்பாயில்(ட்) (Fully boiled)
மேலே சொன்ன ஆஃப்பாயிலை திருப்பிப் போட்டு வெந்தபின் எடுத்து சாப்பிடுவது.


ஆம்லெட் (Omlette)
1. முட்டையை ஒரு பாத்திரத்தில் உடைத்து ஊற்றிக் கொள்ளவும்.
2. அதனுடன் நறுக்கிய வெங்காயம், மிளகாய், உப்பு போட்டு நன்றாக அடித்து கலக்கிக் கொள்ளவும்.
3. பின் தோசைக்கல்லில் எண்ணெய் சேர்த்து ஊற்றி வெந்தபின் மிளகுத்தூள் சேர்த்துக் கொள்ளவும்


பிளைன் ஆம்லெட் (Plain Omlette)
மேலே சொன்ன ஆம்லெட்டில் வெங்காயம், மிளகாய் போடாமல் செய்யவேண்டும்.

ஒன் சைட் ஆம்லெட் (One side Omlette)
ஆம்லெட்டை திருப்பிப் போடாமல் அடிப்பாகம் மட்டும் வேகவிட்டு எடுத்து சாப்பிட வேண்டும்.


ஒயிட் ஆம்லெட் (White Omlette)
ஆம்லெட்டின் செய்முறையில் முட்டையின் மஞ்சள் கருவை நீக்கிவிட்டு (கொஞ்சம் கடினம் தான்) செய்ய வேண்டும்.

ஒயிட் பிளைன் ஆம்லெட் (White Plain Omlette)
பிளைன் ஆம்லெட்டின் செய்முறையில் முட்டையின் மஞ்சள் கருவை நீக்கிவிட்டு (கொஞ்சம் கடினம் தான்) செய்ய வேண்டும்.

கலக்கி (Kalakki)
1. முட்டையை ஒரு பாத்திரத்தில் உடைத்து ஊற்றிக் கொள்ளவும்.
2. அதனுடன் நறுக்கிய வெங்காயம், மிளகாய், உப்பு போட்டு நன்றாக அடித்து கலக்கிக் கொள்ளவும்.
3. சிக்கன் அல்லது மட்டன் குழம்பு சிறிது சேர்த்துக்கொள்ளவும்.
3. பின் தோசைக்கல்லில் எண்ணெய் சேர்த்து ஊற்றி அரைவேக்காட்டில் கொழ கொழவென புரட்டி புரட்டி பந்து போல செய்து சாப்பிடலாம்.

இதன் சுவையை அடித்துக் கொள்ளவே முடியாது.

முட்டை பொரியல்/பொடிமாஸ் (Egg Podimas)
இதற்கும் ஆம்லெட்டின் செய்முறைதான் நன்றாகக் கிளறி விட்டால் முட்டை சுருங்கிவிடும். நல்ல சுவையாக இருக்கும்


முட்டைமாஸ் (Egg mass)
1. அவித்த முட்டையை நான்கு துண்டுகளாக வெட்டிக் கொள்ளவும்.
2. தோசைக்கல்லில் சிறிது சிக்கன் அல்லது மட்டன் குழம்பை முட்டையுடன் சேர்த்து சிறிது நேரம் சமைத்தால் சுவையான முட்டைமாஸ் தயார்.

கொலைவெறியோட என்னைய தேடாதீங்க. மேலே சொன்ன அனைத்தும் அனைவருக்கும் தெரிந்தது தான். இருந்தாலும் இதுகூடத் தெரியாத நம்ம பாசக்கார பேச்சிலர் பயலுக பாவம் கூச்சப்பட்டுக்கிட்டு யார்கிட்ட போய் கேக்கும்? எனவே தாயுள்ளம் கொண்டு அனைத்தையும் சொல்லியிருக்கேன். :)

WEDNESDAY, MAY 12, 2010

உருளைக்கிழங்கு பொடிமாஸ்

இன்னிக்கு ஒரு சுவையான பொரியல்/சைட்டிஷ் ஆன உருளைக்கிழங்கு பொடிமாஸ் எப்படி செய்றதுன்னு பார்க்கலாம்.

தேவையானவை :
உருளைக்கிழங்கு - 1/2 கிலோ
வெங்காயம் - பெரியது 1 / சிறியது 7,8
சக்தி குழம்பு மசாலாப் பொடி - 1 1/2 ஸ்பூன்
எண்ணெய் - 4 ஸ்பூன்
கடுகு - கொஞ்சம்
கறிவேப்பிலை - கொஞ்சம்
உப்பு - தேவையான அளவு

செய்முறை :
1. உருளைக்கிழங்கை தோல் நீக்கி, சிறிய சிறிய துண்டுகளாக வெட்டிக் கொள்ளவும். வெங்காயத்தையும் எப்பவும் போல் சிறிய துண்டுகளாக நறுக்கிக் கொள்ளவும்.

2. வாணலியில் எண்ணெய் ஊற்றி கடுகு, கறிவேப்பிலையை முதலில் போடவும்.

3. பின் வெட்டிய உருளைக்கிழங்கு, வெங்காயத்தை அதில் போட்டு வாணலியில் ஒட்ட விடாமல் நன்றாகக் கிளறி விட்டுக் கொண்டே இருக்கவேண்டும். முதலில் தீயை அதிகமாக வைத்துக் கொண்டால் எளிதில் வதங்கும். கொஞ்சம் வெந்ததும் தீயைக் குறைத்துக் கொள்ளலாம்

4. நன்றாக வதங்கியதும் அதில் குழம்பு மசாலாப் பொடியையும், உப்பையும் சேர்த்து நன்றாகக் கிளறவும்.

5. மசாலாப் பொடி உருளைக்குழங்கில் நன்றாகப் பிடித்ததும் அடுப்பை அணைத்து விடலாம். அவ்வளவுதான் சுவையான உருளைக்கிழங்கு பொடிமாஸ் தயார்.

சுடச்சுட சாப்பிட்டால் அருமையாக இருக்கும். :)

SUNDAY, MAY 9, 2010

முட்டைகோஸ் பொரியல்

தேவையானவை :
முட்டைகோஸ் - 1/2 கிலோ
வெங்காயம் - பெரியது 1 / சிறியது 5,6
சிவப்பு மிளகாய் வத்தல் - 5,6
எண்ணெய் - 3 ஸ்பூன்
பாசிப்பருப்பு - 2 ஸ்பூன்
கடுகு - கொஞ்சம்
கறிவேப்பிலை - கொஞ்சம்
உப்பு - தேவையான அளவு
தேங்காய் துருவல் - கொஞ்சம் (Optional)

செய்முறை :

1. முட்டைகோஸை பொடியாக நறுக்கி/சீவிக் கொள்ளவும். பின் நறுக்கிய கோஸை பாத்திரத்தில் போட்டு தண்ணீரில் கழுவியபின் தண்ணீரை வடித்துவிடவும்.

2. பின் அடுப்பில் அந்தப் பாத்திரத்தை மூடி வைத்து கோஸை வேகவைக்க வேண்டும். அதனுடன் பாசிப்பருப்பையும் சேர்த்துக் கொள்ளவும். தண்ணீர் சேர்க்கத் தேவையில்லை. கோஸில் ஒட்டியிருக்கும் தண்ணீரே போதும். அவ்வப்போது கிளறி விட்டுக் கொள்ளவும்.

3. கோஸ் வேகும் நேரத்தில் வெங்காயத்தை நறுக்கிக் கொள்ளவும்.

4. பின் வாணலியில் எண்ணெய் விட்டு கடுகு, கறிவேப்பிலை, வெங்காயம், மிளகாய் வத்தல் போட்டுத் தாளிக்கவும்.

5. கோஸ் வெந்தவுடன் தாளித்த கலவையும், உப்பும், தேங்காய்துருவலும் சேர்த்து நன்றாகக் கிளறவேண்டும். சிறிது நேரம் மூடி வைத்து பின் பரிமாறினால் சுவையாக இருக்கும்.

குறிப்பு :
காரப்பிரியர்கள் கொஞ்சம் மிளகாய்ப் பொடியையும் உப்புடன் சேர்த்துச் சமைக்கலாம்.

SATURDAY, JANUARY 2, 2010

வாங்க சட்னி வைக்கக் கத்துக்கலாம்

தோசை வார்க்கிறது எப்படின்னு சொன்னியே தொட்டுக்கச் சட்னி எப்படி வைக்கிறதுன்னு சொன்னியாடான்னு நம்ம சாப்பாட்டுல மயங்கின ரசிகர் பட்டாளம் மின்னஞ்சல், அலைபேசி அழைப்புகள்ல திட்டுனதுனால இப்போ சட்னி வைக்கிறது எப்படின்னு பார்க்கலாம். :)


தேவையானவை :

தேங்காய் - அரை மூடி
பொரிகடலை - 25 கிராம்
பச்சை மிளகாய் - 3/4
கடுகு - கொஞ்சம்
கறிவேப்பிலை - கொஞ்சம்
சீரகம் - கொஞ்சம்
உப்பு - கொஞ்சம்

செய்முறை :

1. தேங்காயை பத்தை பத்தையாக வெட்டி மிளகாய், பொரிகடலையுடன் மிக்ஸியில் மிருதுவாக அரைத்துக் கொள்ளவும்.

2. பின்னர் வாணலியில் கடுகு, கறிவேப்பிலை, சீரகம் போட்டு தாளிக்கவும்

3. தாளித்ததை தேங்காய கலவையுடன் சேர்த்துக் கொள்ளவும்.

4. தேவையான அளவு உப்பு சேர்த்துக் கொள்ளவும்

5. கொஞ்சம் தண்ணீர் சேர்த்துக் கொண்டால் சுவையான சட்னி தயார்.

தோசை வார்ப்பது எப்படி ?

அடடா நம்ம வலைப்பக்கம் வந்தே பல மாதங்கள் ஆகிப் போச்சே?? சரி கவலைப்படாமல் இன்னிக்கு தோசை வார்ப்பது எப்படின்னு பார்க்கலாம்.

1. முதல்ல நம்ம பதிவே பேச்சலர்களுக்கானது தான் எனவே தோசைமாவெல்லாம் நீங்களே ஆட்டுக்கல்லிலோ, கிரைண்டரிலோ அரைத்துக் கொள்ளுமாறு சொல்லமாட்டேன் :). ஒழுங்கா போய் கடையிலே 10 ரூபாய்க்கு மாவு வாங்கிக்கோங்க.

2. தோசைக்கல்லை அடுப்பில் வைத்துக் கொள்ளுங்கள்.

3. ஒரு பெரிய வெங்காயத்தை நடுவாக்கில் இரண்டாக நறுக்கி வைத்துக் கொள்ளுங்கள். இது எதுக்குன்னு கேட்கிறீங்களா? அவசரப்படாதீங்க.

4. தோசைக்கல் சூடானவுடன் அரைஸ்பூன் எண்ணெய் ஊற்றி நறுக்கிய வெங்காயத்தால் தோசைக்கல் முழுவதும் பரவுமாறு தடவுங்கள். இப்போ புரிஞ்சதா வெங்காயம் எதுக்குன்னு?

5. குழிக்கரண்டியில் மாவை எடுத்து தோசைக்கல்லின் நடுவில் மாவை ஊற்றி மெதுவாக கரண்டியின் அடிப்பாகத்தால் மாவால் வட்டம் போடவும்.

6. பின்னர் தோசையின் மேலும் எண்ணெய் விடவும். வெந்தவுடன் தீயைக் குறைத்து தோசைக்கரண்டியால் திருப்பிப் போடவும். பின்னர் சட்னியுடன் தொட்டு சாப்பிட்டால் ஐயோ!!! ச்சே!! ஆஹா ... அமுதம். :)

தோசையின் மேல் வெங்காயம், இட்லிப்பொடி இப்படி என்னவேணாலும் தூவி வெங்காயதோசை, பொடிதோசை என சாப்பிட்டு ஜமாய்ங்க ..

THURSDAY, AUGUST 14, 2008

வெண்டைக்காய் பொரியல்

நண்பர்களே! இன்னிக்கு நாம செய்யப் போறது வெண்டைக்காய் பொரியல்.

உயிரோட இருக்கும் போது


கொலை பண்ணினதுக்கப்புறம்


தேவையானவை :
வெண்டைக்காய் - 1/2 கிலோ
வெங்காயம் - பெரியது 1 / சிறியது 5,6
சிவப்பு மிளகாய் வத்தல் - 6,7
எண்ணெய் - 3 ஸ்பூன்
கடுகு - கொஞ்சம்
கறிவேப்பிலை - கொஞ்சம்
உப்பு - தேவையான அளவு

செய்முறை :
1. வெண்டைக்காயை சிறியதாக வட்ட வட்டமாக வெட்டிக் கொள்ளவும். வெங்காயத்தையும் எப்பவும் போல் சிறிய துண்டுகளாக நறுக்கிக் கொள்ளவும்.

2. வாணலியில் எண்ணெய் ஊற்றி கடுகு, மிளகாய் வத்தல், கறிவேப்பிலையை முதலில் போட்டு வதக்கிக் கொள்ளவும்.

3. பின் வெட்டிய வெண்டைக்காய், வெங்காயத்தை அதில் போட்டு வாணலியில் ஒட்ட விடாமல் நன்றாகக் கிளறி விட்டுக் கொண்டே இருக்கவேண்டும்.

4. பத்து நிமிடங்கள் நன்கு வதங்கியதும் அதில் உப்பையும் சேர்த்துக் கிளறவும்.

அவ்வளவுதான் சுடச்சுட வெண்டைக்காய் பொரியல் தயார்.

முன்யோசனைக் குறிப்புகள் :
1. வெண்டைக்காயை ஒரு மணி நேரம் முன்பே வெட்டி வெயில் சிறிது நேரம் வைத்து எடுத்த பின் வதக்கினால் பிசுபிசுவென்று ஒட்டாமல் வரும்.

2. காய் நறுக்கும் போது இரண்டு, மூன்று வெண்டைக்காய்களாக சேர்த்து வெட்டினால் நேரம் மிச்சமாகும்.

3. சமைப்பதற்கு முன் வெண்டைக்காய் நிறைய இருக்கும். ஆனால் வதக்கியபின் கொஞ்சமாக சுருங்கிவிடும். எனவே காய் வாங்கும் போதே இதை மனசில் வைத்துக் கொண்டு தேவையெனில் கொஞ்சம் சேர்த்தே வாங்கவும். :)